Պրոյեկտներ

Հայաստանի Հանրապետությունում՝ մասնավորապես մարզերում, կան շատ ընտանիքներ, որոնք ունեն սոցիալական աջակցության կարիք: «100+ ապահով ընտանիք» ծրագիրը միտված է յուրաքանչյուր ամիս սոցիալական աջակցություն տրամադրելու անապահով ընտանիքների երեխաներին՝ ապահովելով նրանց հագուստով, սննդով և առաջին անհրաժեշտության այլ պարագաներով:

Ամանորը բոլոր երեխաների համար տարվա ամենասիրված օրն է՝ լի հրաշքների սպասումով, սակայն, ցավոք, անապահով ընտանիքների երեխաները զրկված են այդ հրաշալի օրը տոնելու հնարավորությունից: Հաշվի առնելով այդ հանգամանքը՝ «Կարո Հովագիմյան» բարեգործական հիմնադրամը նախաձեռնեց «Ամանորյա ծրագիր»-ը, որի շրջանակում Երևանի և մարզերի ավելի քան 500 երեխաներ Նոր տարուն ընդառաջ նվերներ ստացան Հիմնադրամի Ձմեռ Պապիկի կողմից:

Վերջին տարիներին Հայաստանի Հանրապետությունում կտրուկ աճել է ողնաշարային հիվանդություններ ունեցող երեխաների թիվը, որոնց ոչ բոլոր վիրահատություններն են իրականացվում պետպատվերի շրջանակներում, ուստի «Կարո Հովագիմյան» բարեգործական հիմնադրամը «Ուիգմոր» բժշկական կենտրոնի հետ համագործակցության շրջանակում ստանձնել է իրականացնելու համապատասխան վիրահատություններ՝ պարգևելով առողջ և անհոգ մանկություն մեր փոքրիկ շահառուներին։

«Օգնիր բուժմանը» ծրագիրը բժշկական աջակցության ծրագիր է, որի շրջանակում Հիմնադրամն անհրաժեշտ դեղորայքային աջակցություն է տրամադրում պատերազմում վիրավորում ստացած զինվորներին և հատուկ խնամքի կարիք ունեցող երեխաներին, ինչպես նաև հոգում է նրանց՝ պետության կողմից չֆինանսավորվող անալիզների կամ հետազոտությունների ծախսերը, անհրաժեշտության դեպքում` տրամադրում համապատասխան բժշկական սարքավորումներ:

Ծրագիրը բժշկական-կրթական ծրագիր է, որի շրջանակում Չարենցավան համայնքում (հետագայում նաև այլ համայնքներում) նախատեսվում է հիմնել ռեսուրս – կենտրոններ ԿԱՊԿՈՒ երեխաների համար՝ հագեցած անհրաժեշտ մասնագիտական պարագաներով: Սա կնպաստի երեխաների կրթական և առողջական կարգավիճակի բարելավմանը, իսկ նրանց ծնողները կկարողանան աշխատել և բարելավել իրենց կյանքի որակը:

«ԵՐԵՎԱՆ ՊԱՐԿ». ԵՐԲ ՀԻՇՈՂՈՒԹՅՈՒՆՆ ԱՆՈՒՆ ՈՒՆԻ. Հիմնադրամի և «Երևան պարկ» զվարճանքների զբոսայգու միջև առկա համագործակցության շրջանակում մեր փոքրիկ շահառուները պարբերաբար հնարավորություն են ունենում յուրահատուկ օր անցկացնելու զբոսայգում՝ վայելելով հրաշալի, հեքիաթային և անմոռանալի պահեր: Հիմնադրամի միջոցով երեխաները հնարավորություն ունեն նշելու Հունիսմեկյան տոնը զբոսայգում: Միաժամանակ կազմակերպվել է 1000-ից ավելի արցախահայ երեխաների անվճար մուտքը զվարճանքների զբոսայգի:

Հիմնադրամը, համագործակցելով Աշխատանքի և սոցիալական հարցերի նախարարության «Մասնագիտական կողմնորոշման և կարողությունների զարգացման կենտրոնի»-ի հետ՝ հնարավորությունների և առկա ռեսուրսների շրջանակներում կազմակերպում է ճանաչողական այցեր տարբեր մասնագիտական հաստատություններ՝ Երևանի և հատկապես մարզերի ավագ դպրոցների աշակերտների, ուսանողների մասնակցությամբ:

«Կարո Հովագիմյան» բարեգործական հիմնադրամի թիմը ՀՀ տարբեր մարզերում միջազգային և տեղի մարդասիրական և բարեգործական կազմակերպությունների, համայնքապետարանների հետ համատեղ ապահովել և շարունակում են ապահովել աջակցություն արցախահայ ընտանիքներին: Հիմնադրամի ղեկավարության և բարերարների աջակցության շնորհիվ արցախահայ ընտանիքներին բաժանվում են անկողնային և հիգիենայի պարագաներ, սնունդ, տաք հագուստ (մեծերի, փոքրերի) և մրգի փաթեթներ: